Basshar okorma fua (Story Part-IV)
ꠅꠘꠦ ꠡꠥꠘꠣ ꠎꠦꠔꠇꠥ ꠙꠣꠁꠍꠁꠘ ꠙꠣꠁꠀ ꠔ ꠜꠣꠁꠞ ꠛꠃꠀꠁꠘ ꠈꠥꠡꠤ। ꠅꠘꠦ ꠔꠣꠞꠣ ꠇꠄꠞꠦ ꠜꠣꠁ ꠔꠥꠁꠎꠦ ꠇꠁꠞꠦ ꠅꠃ ꠙꠞꠤ ꠛꠤꠀ ꠇꠞꠔꠦ ꠅꠘꠦ ꠁ ꠙꠞꠤ ꠎꠦ ꠛꠤꠀ ꠇꠞꠤ ꠀꠘꠔꠦ ꠁꠉꠥ ꠇꠣꠘꠣ ꠇꠤ ꠜꠣꠟꠣ ꠇꠤ ꠐꠦꠞꠣ ꠇꠤ ꠟꠦꠋꠞꠣ ꠁꠔꠣꠔꠅ ꠀꠞ ꠀꠝꠞꠣ ꠛꠥꠗ ꠙꠣꠁꠀꠞꠘꠣ। ꠔꠦ ꠎꠤꠅ ꠇꠞ ꠄꠇ ꠇꠣꠝ ꠇꠞ ꠙꠞꠤꠉꠥ ꠀꠘꠔꠦ ꠅꠁꠟꠦ ꠔ ꠀꠉꠟꠣ ꠊꠞ ꠖꠞꠎꠣ ꠛꠣꠘꠣꠁꠔꠦ ꠅꠁꠛꠦ, ꠛꠥꠟꠦ ꠔꠦ ꠀꠁꠌ꠆ꠍꠣ।
ꠅꠘꠦ ꠀꠉꠟꠣ ꠊꠞ ꠖꠞꠎꠣ ꠛꠣꠘꠣꠁꠛꠣꠞ ꠟꠣꠉꠤ ꠔꠣꠞꠣ ꠔꠣꠞꠦ ꠇꠁꠍꠦ ꠅꠘꠦꠔꠅ ꠔꠣꠞ ꠅꠃ ꠒꠦꠉ ꠘꠤꠍꠦ ꠌꠣꠘ ꠛꠣꠠꠤ ꠉꠖꠣ ꠛꠣꠠꠤ ꠘꠤꠍꠦ ꠔꠣꠞ ꠛꠇꠞꠤ ꠘꠍꠦ ꠅꠘꠦ ꠛꠇꠞꠤ ꠘꠦꠘꠉꠤ ꠄꠇ ꠜꠣꠁꠞ ꠛꠃꠄ ꠌꠣꠘ ꠛꠣꠠꠤ ꠉꠖꠣ ꠛꠣꠠꠤ ꠄꠇ ꠎꠘꠦ ꠀꠞ ꠒꠦꠉ ꠘꠤꠍꠁꠘꠉꠤ ꠄꠇ ꠎꠘꠦ। ꠅꠘꠦ ꠔꠤꠘꠅ ꠎꠘꠦ ꠛꠣꠐꠤꠀ ꠘꠤꠍꠁꠘꠉꠤ ꠘꠤꠀ ꠇꠁꠟꠅ ꠔꠤꠘ ꠎꠘꠞꠦ ꠔꠤꠘꠔꠣ ꠖꠤꠟꠣꠝ ꠄꠛꠟꠣ ꠔꠥꠝꠤꠔꠣꠁꠘ ꠀꠝꠣꠞ ꠛꠤꠀꠞ ꠡꠞꠘꠎꠣꠝ ꠔꠣꠁꠀꠞ ꠇꠞꠅ। ꠅꠘꠦ ꠔꠣꠞꠣ ꠀꠘꠍꠦ ꠄꠇꠎꠘꠦ ꠀꠘꠍꠦ ꠛꠡ꠆ꠔꠣ ꠔꠤꠘ ꠜꠣꠁ ꠀꠘꠔꠅ ꠇꠁꠘ꠆ꠘꠣ, ꠄꠇꠎꠘꠦ ꠄꠇꠎꠘꠦ ꠙꠣꠔꠟꠣ ꠛꠡ꠆ꠔꠣꠞ ꠎꠤꠅ ꠔꠞꠙꠣꠟ ꠅꠞ ꠟꠣꠈꠣꠘ ꠅꠔꠣꠖꠤ ꠚꠦꠐꠤꠇꠥꠐ ꠛꠣꠘꠣꠁꠍꠦ। ꠄꠇꠎꠘꠦ ꠛꠦꠟꠣꠃꠎ ꠛꠣꠘꠣꠁꠍꠦ।
ꠇꠄ ꠙꠞꠤꠎꠣꠔꠞ ꠛꠤꠀ ꠅꠔꠣ ꠙꠤꠘꠖꠤꠀ ꠅꠃ ꠅꠄ। ꠅꠘꠦ ꠢꠦꠔꠅ ꠀꠞ ꠀꠗꠣ ꠡꠤꠗꠣ ꠙꠥꠞꠣ ꠔꠦꠞꠣ ꠘꠣꠄ, ꠅꠘꠦ ꠢꠦ ꠅꠔꠣ ꠟꠁꠀ ꠉꠦꠍꠦ। ꠅꠘꠦ ꠍꠄ ꠙꠞꠤꠄ ꠇꠁꠘ ꠇꠁꠘ ꠀꠝꠞꠣ ꠙꠞꠤꠎꠣꠔꠞ ꠛꠤꠀ ꠅꠁꠟꠅ ꠙꠞꠤꠡ꠆ꠔꠣꠘꠤ ꠡꠛꠔꠣ ꠖꠤꠀ ꠀꠞ ꠁꠔꠣ ꠔꠥꠝꠣꠞꠦ ꠇꠦ ꠖꠤꠍꠦ? ꠛꠥꠟꠦ ꠁꠔꠣ ꠀꠝꠣꠞ ꠜꠣꠁꠞ ꠛꠃꠀꠁꠘꠔꠦ ꠎꠦ ꠡꠣꠔ ꠍꠄꠅ ꠜꠣꠁꠞ ꠛꠃ ꠀꠍꠁꠘ ꠀꠝꠤꠔꠅ ꠛꠤꠀ ꠇꠞꠍꠤꠘꠣ ꠢꠦꠞꠣ ꠀꠝꠣꠞꠦ ꠖꠤꠍꠁꠘ।
ꠎꠦ ꠅꠈꠍꠣꠁꠘ ꠙꠤꠘ꠆ꠖꠣꠁꠀ ꠛꠥꠟꠦ ꠙꠞꠤꠎꠣꠔꠞ ꠛꠤꠀ ꠅꠄ, ꠅꠘꠦ ꠔꠣꠞꠣ ꠙꠞꠤꠘ꠆ꠔꠦ ꠌꠤꠘ꠆ꠔꠣ ꠇꠞꠦ ꠎꠦ ꠀꠝꠒꠣꠞ ꠎꠦ ꠟꠉꠞ ꠄꠉꠥ ꠙꠞꠤ ꠛꠤꠀ ꠖꠤꠔꠣꠝ ꠢꠤꠔꠣ ꠔ ꠌꠣꠟꠣꠇ ꠢꠤꠔꠣꠄ ꠁꠉꠥꠞꠦ ꠑꠉꠤꠟꠤꠛꠣ। ꠛꠥꠟꠦ ꠌꠣꠘ ꠛꠣꠠꠤ ꠉꠖꠣ ꠛꠣꠠꠤ ꠔꠥꠝꠤ ꠇꠣꠞ ꠀꠔꠅ ꠖꠤꠍꠅ। ꠛꠥꠟꠦ ꠀꠝꠣꠞ ꠜꠣꠁꠞ ꠛꠃꠞ ꠀꠔꠅ ꠒꠦꠉꠅ ꠖꠤꠟꠣꠁꠍꠤ, ꠛꠇꠞꠤꠅ ꠖꠤꠟꠣꠁꠍꠤ, ꠌꠣꠘ ꠛꠣꠠꠤ ꠉꠖꠣ ꠛꠣꠠꠤ ꠡꠛꠔꠣ ꠖꠤꠟꠣꠁꠍꠤ, ꠛꠥꠟꠦ ꠘꠣ ꠁꠟꠣ ꠅꠁꠔ ꠘꠣꠄ। ꠔꠥꠝꠣꠐꠣꠁꠘ ꠀꠝꠞꠣꠞ ꠛꠁꠘ ꠄꠉꠥ ꠛꠤꠀ ꠖꠤꠟꠣꠝ ꠀꠞ ꠔꠣꠞꠣ ꠇꠁꠍꠦ ꠊꠞ ꠛꠣꠘꠣꠁꠔꠣꠝ ꠛꠣ ꠙꠞꠤꠡ꠆ꠔꠣꠘꠤ ꠊꠞ ꠛꠣꠘꠣꠁꠀ ꠖꠤꠟꠣꠝ ꠙꠞꠤꠡ꠆ꠔꠣꠘꠤ ꠈꠣꠅꠀꠞꠅ ꠖꠤꠝꠥ ꠡꠛꠔꠣ।
ꠔꠥꠝꠣꠞ ꠜꠣꠁꠞ ꠛꠃ ꠀꠁꠘ꠆ꠔꠞꠦ ꠇꠁꠛꠣꠄ ꠎꠦ ꠔꠥꠝꠣꠞ ꠊꠞꠅ ꠉꠤꠀ ꠀꠁꠎꠇꠦ ꠈꠣꠅꠀꠞ ꠈꠣꠁꠔꠣ।ꠇꠞꠤꠀ ꠔꠣꠞꠣ ꠍꠄꠅ ꠙꠞꠤꠄ ꠔꠣꠞꠣꠞ ꠅꠃ ꠙꠞꠤꠞꠦ ꠀꠖꠝ ꠎꠣꠔꠅ ꠐꠣꠁꠘ ꠛꠤꠀ ꠖꠤꠀ ꠟꠁꠀ ꠀꠁꠍꠦ। ꠅꠘꠦ ꠔꠣꠞ ꠊꠞ ꠔ ꠙꠞꠤꠡ꠆ꠔꠣꠘꠤ ꠊꠞ ꠙꠞꠤꠡ꠆ꠔꠣꠘꠤ ꠈꠣꠘꠤꠅ ꠀꠁꠍꠦ। ꠅꠘꠦ ꠡꠣꠔꠅ ꠜꠣꠁꠞ ꠛꠃꠄ ꠇꠤꠔꠣ ꠇꠞꠍꠁꠘ ꠔꠣꠁꠘ ꠔꠣꠁꠘ ꠝꠄꠟꠣꠖꠤ ꠟꠦꠚꠤꠀ ꠔꠣꠞ ꠊꠞ ꠀꠇꠤꠟ ꠟꠦꠚꠔꠣ ꠔꠣꠁꠘ ꠔꠣꠁꠘ ꠝꠄꠟꠣꠖꠤ ꠟꠦꠚꠤꠀ ꠔꠁ ꠞꠣꠈꠍꠁꠘ।
ꠅꠈꠘ ꠔ ꠙꠞꠤꠎꠣꠔ ꠓꠥꠇꠔꠦ ꠙꠣꠞꠦꠘꠣ ꠝꠄꠟꠣꠞ ꠉꠘ꠆ꠗ ꠅꠃ ꠔꠣꠞꠣ ꠇꠤꠔꠣ ꠇꠞꠟ ꠇꠁꠟꠅ ꠎꠦ ꠔꠥꠝꠤꠔꠅ ꠀꠖꠝꠎꠣꠔ ꠔꠥꠝꠤ ꠙꠞꠤ ꠎꠣꠔꠞ ꠟꠉꠦ ꠕꠣꠇꠔꠣꠄ ꠙꠣꠞꠔꠣꠄ ꠘꠣꠄ। ꠔꠥꠝꠤ ꠔꠣꠁꠘ ꠀꠉꠟꠣ ꠔꠣꠇꠔꠣ ꠅꠁꠛꠣꠄ, ꠀꠞ ꠔꠥꠝꠣꠞ ꠜꠣꠁꠞ ꠛꠃꠀꠁꠘ ꠁꠔꠣ ꠎꠦꠔꠣ ꠁꠔꠣ ꠜꠣꠟꠣ ꠘꠣꠄ।
ꠄꠈꠘ ꠔꠥꠝꠤ ꠄꠇ ꠈꠣꠝ ꠇꠞꠅ ꠔꠥꠝꠤ ꠀꠉꠟꠣ ꠄꠇꠐꠣ ꠛꠣꠠꠤ ꠛꠣꠘꠣꠁꠀ ꠀꠞ ꠔꠥꠝꠣꠞ ꠛꠃ ꠟꠁꠀ ꠕꠣꠇꠅ ꠀꠞ ꠔꠣꠞꠣ ꠟꠣꠟꠌ ꠇꠞꠍꠦ ꠔꠣꠞꠣꠞ ꠡꠛꠔꠣ ꠘꠤꠃꠇꠉꠤ ꠀꠞ ꠔꠥꠝꠣꠞ ꠎꠦꠔꠣꠞ ꠖꠞꠇꠣꠞ ꠙꠞꠤꠡ꠆ꠔꠣꠘꠤ ꠀꠁꠛꠅ ꠈꠣꠁꠛꠣꠄ।
ꠇꠁꠀ ꠀꠞ ꠔꠣꠘꠞꠦ ꠀꠉꠟꠣ ꠖꠤꠟꠣꠁꠟꠅ ꠀꠇꠤꠟ ꠛꠣꠘꠣꠁꠀ। ꠀꠞ ꠔꠣꠞꠣ ꠍꠄꠅ ꠜꠣꠁꠞ ꠛꠃꠄ ꠔꠣꠞꠣ ꠔꠣꠞꠣꠞ ꠈꠣꠁꠟꠣ।
 ){kind=link}
0 Comments