foshu fakire maya korle Allah shajjo koroin (Story Part-I)

 

foshu fakire maya korle Allah shajjo koroin

 

ꠀꠍꠤꠟ ꠄꠇ ꠛꠦꠐꠤ, ꠛꠦꠐꠤꠞ ꠄꠇ ꠙꠥꠀ। ꠅꠘꠦ ꠄꠇ ꠙꠥꠀꠅ ꠛꠦꠐꠤꠞ ꠡꠤꠗꠣ-ꠛꠤꠗꠣꠞ ꠟꠣꠈꠣꠘ ꠀꠞꠇꠤꠟ ꠎꠦꠝꠘ ꠙꠥꠀ ꠅꠔꠅꠔꠣ ꠛꠥꠏ ꠘꠣꠄ। ꠅꠘꠦ ꠙꠥꠀꠄ ꠇꠤꠔꠣ ꠇꠞꠦ, ꠎꠦꠘꠅ ꠎꠦꠔꠣ ꠙꠣꠄ ꠅꠔꠣ ꠇꠤꠘꠤꠀ ꠀꠘꠦ, ꠎꠦꠔꠣꠞ ꠛꠣꠁꠌ꠆ꠌꠣ ꠙꠣꠁꠛꠅ ꠅꠔꠣ ꠇꠤꠘꠤꠀ ꠀꠘꠦ। ꠅꠘꠦ ꠛꠦꠐꠤꠞ ꠙꠥꠀꠄ ꠇꠤꠔꠣ ꠇꠞꠍꠦ ꠄꠇꠎꠘꠦ ꠀꠍꠣꠞꠤꠀ ꠄꠇꠐꠣ ꠛꠤꠟꠣꠁꠞ ꠛꠣꠁꠌ꠆ꠌꠣ ꠝꠣꠞꠤꠟꠣꠞ।ꠅꠘꠦ ꠖꠡ ꠐꠦꠇꠣ ꠖꠤ ꠅꠃ ꠛꠤꠟꠣꠁꠞ ꠛꠣꠁꠌ꠆ꠌꠣꠐꠣ ꠇꠤꠘꠤꠀ ꠀꠘꠍꠦ, ꠀꠘꠤꠀ ꠁ ꠛꠣꠁꠌ꠆ꠌꠣꠐꠣ ꠄꠇꠐꠣ ꠙꠤꠘꠎꠤꠞꠣꠔ ꠛꠜꠞꠤꠀ ꠞꠣꠈꠍꠦ। ꠔ ꠀꠞꠅ ꠇꠄꠖꠤꠘ ꠛꠣꠖꠦ ꠄꠇꠐꠣ ꠌꠤꠟꠞ ꠛꠣꠁꠌ꠆ꠌꠣ ꠝꠣꠞꠤꠟꠣꠞ, ꠅꠣꠃꠐꠣ ꠇꠤꠘꠤꠀ ꠀꠘꠍꠦ। ꠢꠥꠞꠥꠔꠣꠁꠘ꠆ꠔꠦ ꠝꠣꠞꠁꠘ ꠀꠞ ꠢꠦ ꠟꠁꠀ ꠀꠘꠦ ꠖꠡ ꠐꠦꠇꠣ ꠇꠞꠤ। ꠔꠦ ꠀꠞꠅ ꠇꠄꠖꠤꠘ ꠙꠞꠦ ꠀꠞꠦꠇꠐꠣ ꠘꠦꠃꠟꠞ ꠛꠣꠁꠌ꠆ꠌꠣ ꠇꠤꠘꠤꠀ ꠀꠘꠍꠦ। ꠅꠔꠣ ꠇꠞꠤ ꠀꠞꠦꠇ ꠇꠄꠖꠤꠘ ꠙꠞꠦ ꠄꠇꠐꠣ ꠃꠖꠞ ꠛꠣꠁꠌ꠆ꠌꠣ ꠇꠤꠘꠤꠀ ꠀꠘꠍꠦ, ꠅꠈꠘ ꠌꠣꠁꠞꠐꠣ ꠛꠣꠁꠌ꠆ꠌꠣ ꠇꠤꠘꠤꠀ ꠀꠘꠍꠦ ꠌꠣꠁꠞ ꠎꠣꠔꠦ ꠀꠘꠤꠀ ꠌꠣꠁꠞꠐꠣ ꠙꠤꠘꠎꠤꠞꠣꠔ ꠜꠞꠤꠀ ꠞꠣꠈꠍꠦ। ꠞꠣꠈꠣꠞ ꠙꠞꠦ ꠔꠣꠞ ꠝꠣꠄ ꠛꠣꠖꠡꠣꠢꠞ ꠛꠣꠠꠤ ꠇꠣꠝ ꠇꠞꠔꠣ, ꠗꠘꠤ ꠄꠇ ꠛꠣꠖꠡꠣꠢꠞ ꠛꠣꠠꠤ ꠇꠣꠝ ꠇꠞꠔꠣ, ꠇꠣꠝ ꠇꠞꠤꠀ ꠎꠦꠔꠣꠃ ꠙꠣꠁꠔꠣ ꠀꠘꠤꠀ ꠙꠥꠀꠞꠦ ꠈꠣꠛꠣꠁꠔꠣ।

ꠀꠞ ꠙꠥꠀ ꠀꠞꠇꠤꠟ ꠡꠞꠟ ꠡꠥꠎꠣ ꠙꠥꠀ ꠇꠥꠘꠥ ꠙꠦꠌ-ꠙꠣꠌꠞ ꠘꠣꠄ। ꠅꠘꠦ ꠅꠟꠣ ꠇꠞꠤ ꠇꠞꠤ ꠖꠤꠘ ꠎꠣꠞ ꠅꠔꠣ ꠎꠦꠔꠣ ꠝꠣꠄ ꠀꠘꠦ ꠅꠔꠣꠃ ꠙꠤꠘꠎꠤꠞꠣꠔ, ꠌꠣꠁꠞꠅ ꠙꠤꠘꠎꠤꠞꠣꠔ ꠢꠔꠣꠞꠦꠅ ꠈꠣꠘꠤ ꠖꠦꠄ ꠙꠥꠀꠄꠅ ꠈꠣꠅꠀꠞ ꠈꠣꠄ। ꠈꠣꠁ ꠈꠣꠁ ꠇꠔꠖꠤꠘ ꠉꠦꠍꠦ ꠅꠘꠦ ꠙꠥꠀ ꠝꠣꠄ ꠈꠄ ꠅꠛꠦꠐꠣ ꠔꠥꠝꠤ ꠇꠥꠘꠥꠇꠣꠘꠅ ꠇꠣꠝꠅ-ꠃꠝꠅ ꠎꠣꠅ, ꠇꠣꠝꠅ ꠘꠣ ꠉꠦꠟꠦ ꠀꠝꠣꠞ ꠞꠥꠎꠤꠖꠤ ꠇꠤꠟꠣ ꠀꠞ ꠔꠥꠝꠣꠞꠦ ꠇꠄꠖꠤꠘ ꠈꠣꠛꠣꠁꠝꠥ ꠔꠥꠝꠤꠔꠅ ꠡꠤꠀꠘ ꠅꠁꠍꠅ ꠛꠤꠀꠞ ꠃꠙꠎꠥꠇ꠆ꠔ ꠅꠁꠍꠅ। ꠔꠦ ꠅꠘꠦ ꠀꠝꠣꠞ ꠛꠣꠄ ꠌꠣꠁꠟꠦ ꠈꠣꠟꠤ ꠅꠁꠛꠘꠤ ? ꠔꠥꠝꠤ ꠇꠥꠘꠥ ꠈꠣꠘꠅ ꠇꠣꠝ-ꠇꠣꠎꠅ ꠎꠣꠅ। ꠅꠃ ꠇꠁꠟꠅ ꠉ ꠀꠝ꠆ꠝꠣ ꠀꠝꠤ ꠀꠁꠎꠇꠦ ꠇꠣꠝꠅ ꠎꠣꠁꠞꠣꠝꠉꠤ ꠄꠈꠣꠘꠅ। ꠅ ꠙꠕ ꠖꠤꠍꠦ ꠙꠥꠀ ꠞꠣꠡ꠆ꠔꠣ ꠛꠣꠄ ꠀꠐꠔꠦ ꠀꠐꠔꠦ ꠄꠈꠣꠘꠅ ꠉꠤꠀ ꠛꠁꠍꠦ ꠉꠥꠚꠣꠐꠞ ꠙꠣꠞꠅ ꠉꠤꠀ ꠛꠁꠍꠦ ꠢꠦꠞꠣꠘ ꠅꠁꠀ ꠇꠣꠝꠅ ꠎꠣꠁꠔꠅ। ꠢꠦꠞꠣꠘ ꠅꠁꠀ ꠛꠁꠍꠦ ꠅꠘꠦ ꠖꠦꠈꠦ ꠄꠈꠐꠣ ꠙꠣꠕꠞ ꠖꠦꠈꠣ ꠎꠣꠄ ꠡꠥꠘ꠆ꠖꠞ ꠄꠇꠐꠣ ꠙꠣꠕꠞ ꠖꠦꠈꠣ ꠎꠣꠞ।

 ꠅꠃ ꠙꠥꠀꠄ ꠍꠤꠋꠟꠣꠖꠤ ꠝꠣꠐꠤ ꠔꠣꠇꠤ ꠈꠥꠖꠤꠀ ꠅꠃ ꠀꠋꠐꠤꠐꠣ ꠔꠥꠟꠤꠀ ꠟꠁꠍꠦ ꠄꠇꠐꠣ ꠙꠣꠕꠞꠞ ꠀꠋꠐꠤ। ꠎꠦꠔꠇꠥ ꠙꠣꠕꠞꠞ ꠀꠋꠐꠤ ꠔꠥꠟꠤꠀ ꠟꠁꠍꠦ ꠙꠥꠀꠄ ꠅꠘꠦ ꠟꠅꠀꠞ ꠙꠞꠦ ꠙꠥꠀꠄ ꠅꠃ ꠀꠋꠐꠤꠐꠣ ꠀꠘꠤꠀ ꠀꠞ ꠙꠣꠇ꠆ꠇꠣꠞ ꠝꠣꠎꠦ ꠊꠡꠣꠞ, ꠊꠡꠣꠁꠀ ꠙꠞꠤꠡ꠆ꠇꠣꠞ ꠇꠞꠦꠞ ꠀꠞꠇꠤ ꠡꠥꠘ꠆ꠖꠞ ꠇꠞꠦꠞ। ꠄꠞ ꠝꠣꠎꠦ ꠡꠣꠔꠎꠘ ꠖꠣꠘꠛ ꠀꠁꠍꠦ, ꠎꠦꠝꠘ ꠙꠞꠤ ꠀꠁꠀ ꠎꠤꠇꠣ ꠇꠞꠍꠦ ꠎꠦ ꠀꠝꠒꠣꠞꠦ ꠒꠣꠇꠟꠦ ꠇꠤꠔꠣꠞ ꠟꠣꠉꠤ ? ꠛꠥꠟꠦ ꠀꠝꠤꠔꠅ ꠔꠥꠝꠣꠔꠣꠘꠞꠦ ꠌꠤꠘꠤꠘꠣ, ꠛꠥꠟꠦ ꠁꠇꠐꠣꠔꠅ ꠀꠝꠒꠣꠞ ꠙꠞꠤ ꠎꠣꠔꠤꠅ ꠀꠋꠐꠤ, ꠁꠇꠐꠣꠔ ꠊꠡꠣ ꠖꠤꠀ ꠎꠦꠔꠣ ꠌꠣꠁꠛꠦ ꠅꠔꠣ ꠙꠣꠁꠛꠦ। ꠛꠥꠟꠦꠔꠅ ꠀꠝꠤꠔꠅ ꠄꠇꠛꠣꠞꠦ ꠉꠞꠤꠛ, ꠀꠝꠤ ꠄꠇꠛꠣꠞꠦ ꠉꠞꠤꠛ ꠀꠝꠣꠞ ꠊꠞ ꠖꠞꠎꠣ ꠘꠣꠁ, ꠎꠣꠉꠣ ꠡꠝ꠆ꠙꠖ ꠘꠣꠁ, ꠔꠦ ꠀꠝꠤ ꠌꠣꠁ ꠎꠦ ꠀꠝꠣꠞ ꠊꠞ ꠖꠞꠎꠣ ꠙꠣꠇꠣ ꠅꠁꠎꠤꠔꠅ ꠡꠥꠘ꠆ꠖꠞ ꠇꠞꠤ ꠄꠇꠐꠣ ꠛꠤꠟꠒꠤꠋ ꠅꠁꠔ ꠀꠝꠣꠞ ꠊꠞꠅ ꠡꠛꠔꠣ ꠅꠁꠔꠅ। ꠅꠃ ꠇꠕꠣꠞ ꠟꠉꠦ ꠎꠦꠝꠘꠦ ꠁ ꠊꠡꠣ ꠖꠤꠀ ꠇꠕꠣ ꠇꠁꠍꠦ ꠇꠕꠣꠞ ꠟꠉꠦꠃ ꠔꠣꠞꠣ ꠁꠟꠣ ꠛꠣꠘꠣꠁꠀ ꠖꠤꠟꠣꠁꠍꠁꠘ, ꠎꠦ ꠙꠟꠤꠡ꠆ꠔꠣꠘꠤ ꠊꠞ ꠛꠣꠘꠣꠁꠀ ꠖꠤꠟꠣꠁꠍꠁꠘ ꠔꠣꠞꠦ। ꠅꠘꠦ ꠙꠞꠤꠡ꠆ꠔꠣꠘꠤ ꠊꠞ ꠎꠦꠔꠇꠥ ꠅꠁꠍꠦ ꠅꠀꠞ ꠙꠞꠦ ꠄ ꠝꠣꠞꠦ ꠇꠁꠍꠦ ꠎꠦ ꠔꠥꠝꠤ ꠀꠞ ꠁ ꠛꠣꠖꠡꠣꠢꠞ ꠛꠣꠠꠤ ꠉ ꠝꠣꠁ ꠀꠞ ꠇꠣꠝꠅ ꠎꠣꠁꠅꠘꠣ।

 ꠛꠥꠟꠦ ꠛꠦꠐꠣ ꠀꠡ꠆ꠔꠣ ꠎꠤꠛꠘ ꠇꠣꠝ ꠇꠞꠣ ꠀꠘꠤꠀ ꠈꠣꠛꠣꠁꠟꠣꠝ ꠀꠞ ꠄꠛꠟꠣ ꠛꠣꠡ꠆ꠡꠣꠞ ꠛꠣꠠꠤ ꠀꠝꠤ ꠇꠣꠝꠅ ꠎꠣꠁꠔꠣꠝꠘꠣ ꠛꠤꠡꠄ ꠇꠤꠔꠣꠞꠦ। ꠛꠥꠟꠦꠉꠅ ꠝꠣꠁ ꠀꠝꠒꠣꠞ ꠇꠤꠌ꠆ꠍꠥꠞ ꠄꠛꠟꠣ ꠅꠜꠣꠛ ꠘꠣꠁ, ꠅꠘꠦ ꠎꠦꠇꠐꠣ ꠌꠣꠁꠝꠥ ꠅꠇꠐꠣ ꠅꠁꠛꠅ। 

ꠅꠘꠦ ꠝꠣꠞꠦ ꠎꠞꠤꠞ ꠇꠣꠙꠠ, ꠎꠞꠤꠞ ꠎꠥꠔꠣ, ꠡꠛꠔꠣ ꠙꠤꠘꠖꠣꠁꠍꠦ ꠎꠦ ꠙꠞꠣꠡ꠆ꠔꠣꠘꠤꠔꠅ ꠡꠛꠔꠣ ꠢꠦ ꠎꠦꠇꠐꠣꠃ ꠌꠣꠁꠛꠅ ꠅꠇꠐꠃ ꠅꠞ। ꠅꠘꠦ ꠝꠣꠄ ꠃꠑꠤꠀ ꠇꠞꠞꠦ ꠙꠥꠔ ꠅꠘꠦ ꠔ ꠛꠣꠖꠡꠣꠢꠦ ꠁ ꠝꠣꠘꠥꠡ ꠢꠤ ꠝꠣꠘꠥꠡ ꠙꠣꠑꠣꠁꠞꠣ ꠛꠦꠐꠤꠄ ꠇꠣꠝꠅ ꠎꠣꠁꠔꠅ, ꠇꠁꠍꠦ ꠘꠣ ꠀꠝꠤꠔꠅ ꠀꠞ ꠇꠣꠝ ꠇꠞꠔꠣꠝ ꠘꠣꠄ। ꠄꠛꠟꠣ ꠀꠝꠤ ꠗꠘꠤ ꠅꠁꠉꠦꠍꠤ, ꠀꠝꠤ ꠀꠞ ꠇꠣꠝꠅ ꠘꠣ ꠉꠦꠟꠦꠅ ꠅꠁꠛꠅ। ꠅꠘꠦ ꠝꠣꠁꠘꠡꠦ ꠎꠤꠇꠣꠄ ꠎꠦ ꠁ ꠛꠦꠐꠤ ꠛꠣꠖꠡꠣꠢꠞ ꠛꠣꠠꠤ ꠇꠣꠝ ꠇꠞꠔꠅ ꠄꠛꠟꠣ ꠎꠦꠘꠦ ꠛꠦꠐꠤꠞ ꠙꠥꠀꠞ ꠅꠔꠔꠣ ꠅꠁꠟꠅ ꠇꠤꠟꠣ ꠅꠁꠟꠅ! ꠅꠘꠦ ꠢꠦ ꠀꠞ ꠡꠣꠞ ꠇꠕꠣ ꠇꠄꠘꠣ, ꠎꠦ ꠅꠟꠣ ꠀꠝꠤ ꠙꠣꠁꠍꠤ ꠄꠞ ꠖꠣꠘꠦ ꠁꠇꠐꠣ ꠅꠁꠍꠦ।

 ꠅꠘꠦ ꠁ ꠇꠕꠣꠔꠅ ꠇꠞꠘꠣ ꠉꠥꠙꠘ ꠞꠣꠈꠤꠖꠤꠍꠦ, ꠞꠣꠈꠣ ꠛꠣꠖꠦ ꠉꠦꠍꠦ ꠇꠄꠇꠖꠤꠘ, ꠅꠘꠦ ꠛꠣꠖꠡꠣꠢꠞ ꠃꠎꠤꠞ ꠀꠍꠤꠟ ꠀꠇ꠆ꠇꠟꠛꠘ ꠛꠦꠡꠤ ꠀꠞꠇꠤ ꠛꠥꠖ꠆ꠗꠤꠝꠣꠘ ꠄꠇꠐꠣ ꠃꠎꠤꠞ ꠀꠍꠤꠟ। ꠅꠘꠦ ꠇꠅꠇꠖꠤꠘ ꠙꠞꠦ ꠢꠦ ꠇꠞ ꠅ ꠀꠝ꠆ꠝꠣ ꠄꠈꠣꠘ ꠇꠣꠝ ꠇꠞꠅ, ꠛꠥꠟꠦ ꠇꠤꠔꠣ, ꠛꠥꠟꠦ ꠛꠣꠖꠡꠣꠢꠞ ꠙꠥꠞꠤ ꠉꠤꠀ ꠝꠣꠔ ꠖꠤꠟꠣꠃ ꠀꠝꠣꠞ ꠐꠣꠁꠘ ꠛꠤꠀ ꠖꠤꠛꠘꠤ?