foshu fakire maya korle Allah shajjo koroin (Story Part-II)
ꠛꠥꠟꠦꠞꠦ ꠙꠥꠔ ꠡꠣꠞꠣ ꠎꠤꠛꠘ ꠛꠣꠖꠡꠣꠢꠞ ꠛꠣꠠꠤ ꠇꠣꠝ ꠇꠞꠣ ꠈꠣꠁꠍꠤ ꠀꠞ ꠛꠣꠖꠡꠣꠢꠞ ꠄꠇ ꠙꠥꠞꠤ ꠔꠞ ꠐꠣꠁꠘ ꠖꠤꠛꠅ ꠇꠤꠟꠣ? ꠛꠥꠟꠦ ꠎꠣꠃ ꠔꠥꠝꠤ ꠝꠣꠔꠉꠤ ꠎꠣꠃ, ꠎꠦꠇꠐꠣ ꠌꠣꠁꠛꠅ ꠀꠝꠤ ꠅꠇꠐꠣ ꠖꠤꠔꠣꠝ ꠙꠣꠞꠝꠥ, ꠛꠣꠖꠡꠣꠢꠞꠦ ꠇꠁꠅ।
ꠅꠘꠦ ꠛꠦꠐꠤꠔꠅ ꠛꠤꠙꠖꠅ ꠙꠞꠍꠦ ꠙꠥꠀꠞꠈꠣꠘ ꠇꠕꠣꠅ ꠞꠣꠈꠔꠅ ꠀꠞ ꠛꠣꠖꠡꠣꠢꠞ ꠛꠣꠠꠤ ꠉꠤꠀ ꠇꠤꠟꠣ ꠇꠁꠔꠅ, ꠒꠞ ꠇꠞꠦꠞ ꠛꠦꠐꠤꠞ। ꠅꠘꠦ ꠛꠦꠐꠤ ꠘꠣꠄ ꠒꠞꠣꠁ ꠒꠞꠣꠁꠀ ꠀꠡ꠆ꠔꠦ ꠀꠡ꠆ꠔꠦ ꠢꠣꠐꠤ ꠢꠣꠐꠤ ꠉꠦꠍꠦ। ꠅꠘꠦ ꠎꠣꠅꠀꠞ ꠙꠞꠦ ꠛꠣꠖꠡꠣꠢꠦ ꠎꠤꠇꠣꠁꠍꠁꠘ ꠉ ꠌꠤꠘ꠆ꠔꠣ ꠙꠣꠞꠞꠣꠘꠣ ꠎꠦ ꠛꠦꠐꠤꠞ ꠙꠤꠘ꠆ꠘꠞ ꠇꠣꠙꠞ ꠍꠥꠙꠞ ꠖꠦꠇꠤꠀ, ꠎꠦ ꠔꠥꠝꠣꠞ ꠁ ꠅꠛꠡ꠆ꠔꠣ ꠅꠁꠟꠅ ꠇꠤꠟꠣ। ꠛꠥꠟꠦ ꠁꠔꠣ ꠀꠝꠣꠞ ꠀꠟ꠆ꠟꠣꠄ ꠖꠤꠍꠁꠘ। ꠛꠥꠟꠦ ꠀꠟ꠆ꠟꠄ ꠇꠤꠟꠣ ꠖꠤꠟꠣ ꠃꠍꠤꠟ꠆ꠟꠣ ꠇꠞꠟꠦꠔꠅ ꠖꠤꠔꠣ, ꠛꠥꠟꠦ ꠎꠦꠇꠐꠣꠞ ꠃꠍꠤꠟ꠆ꠟꠣ ꠞꠣꠉꠦ ꠄꠇꠐꠣ ꠃꠌꠤꠟ꠆ꠟꠣꠄ ꠁꠔꠣ ꠀꠝꠣꠞ ꠀꠟ꠆ꠟꠣꠄ ꠖꠤꠍꠁꠘ।
ꠔꠦ ꠛꠥꠟꠦ ꠅꠘꠦ ꠇꠤꠔꠣꠞ ꠟꠣꠉꠤ ꠀꠁꠍꠅ ꠇꠣꠝ ꠇꠞꠔꠣꠄꠘꠤ, ꠛꠥꠟꠦ ꠎꠤꠘꠣ ꠛꠣꠖꠡꠣꠢ! ꠀꠝꠤ ꠀꠁꠍꠤ ꠀꠙꠘꠣꠞ ꠉꠦꠍꠦ ꠎꠦ ꠀꠙꠘꠣꠞ ꠙꠥꠞꠤ ꠀꠝꠣꠞ ꠙꠥꠀꠞ ꠐꠣꠁꠘ ꠛꠤꠀ ꠖꠤꠛꠣꠄꠘꠤ। ꠅꠘꠦ ꠛꠣꠖꠡꠣꠢꠦ ꠔ ꠔꠣꠁꠘ ꠃꠑꠍꠁꠘ ꠌꠦꠔꠅ ꠗꠞꠍꠦ ꠔꠣꠘ ꠇꠤꠟꠣ ꠀꠡ꠆ꠔꠣ ꠎꠤꠛꠘ ꠇꠣꠝ ꠇꠞꠟꠣ ꠀꠞ ꠀꠁꠎꠇꠦ ꠀꠝꠣꠞ ꠙꠥꠞꠤ ꠖꠤꠟꠣꠁꠔꠣꠝ ꠔꠞ ꠙꠥꠀꠞ ꠐꠣꠁꠘ ꠛꠤꠀ। ꠅꠘꠦ ꠃꠎꠤꠞ ꠎꠦꠘꠅ ꠛꠥꠖ꠆ꠗꠤꠝꠣꠘ ꠀꠍꠤꠟ ꠃꠎꠤꠞꠦ ꠃꠑꠤꠀ ꠇꠁꠟꠅ ꠎꠦ ꠑꠤꠇ ꠀꠍꠦ। ꠛꠣꠖꠡꠣꠢ ꠀꠙꠘꠦ ꠞꠣꠉ ꠇꠞꠔꠣ ꠇꠦꠘꠦ ꠞꠣꠉꠞ ꠇꠥꠘꠥ ꠇꠣꠞꠘ ꠘꠣꠁ।
ꠀꠙꠘꠣꠞ ꠙꠥꠞꠤ ꠎꠦ ꠛꠤꠀ ꠖꠤꠛꠣ ꠇꠃꠇꠣ ꠛꠥꠟꠦ ꠛꠤꠀ ꠖꠤꠝꠥ, ꠢꠦ ꠁꠘꠅ ꠡꠞꠔꠅ ꠀꠍꠦ ꠅꠃ ꠡꠞꠔꠅ ꠝꠔꠦ ꠎꠤꠘꠤꠡ ꠎꠥꠖꠤꠘ ꠖꠤꠔꠅ ꠙꠣꠞꠦ ꠔꠦ ꠛꠤꠀ ꠖꠤꠛꠣ। ꠅꠘꠦ ꠛꠣꠖꠡꠣꠢꠦ ꠎꠤꠇꠣ ꠇꠞꠟꠣ ꠇꠤꠔꠣꠞꠦ ꠡꠞꠔꠅ, ꠛꠥꠟꠦ ꠇꠃ ꠀꠙꠘꠣꠞ ꠛꠣꠠꠤꠄ ꠀꠞ ꠔꠣꠞ ꠛꠣꠠꠤꠄ ꠡꠥꠘꠣꠞ ꠎꠣꠋꠉꠣꠟ ꠎꠥꠖꠤꠘ ꠖꠤꠔꠅ ꠙꠣꠞꠦ ꠀꠞ ꠄꠇꠐꠣ ꠖꠥꠗꠞ ꠖꠤꠊꠤ ꠄꠇꠐꠣ ꠔꠦꠟꠞ ꠖꠤꠊꠤ ꠖꠥꠁꠐꠣ ꠖꠤꠊꠤ ꠖꠤꠔꠅ ꠙꠣꠞꠦ ꠙꠥꠛꠦ ꠙꠡ꠆ꠌꠤꠝꠦ ꠄꠞ ꠛꠣꠖꠦ ꠚꠥꠟꠞ ꠛꠣꠉꠣꠘ ꠅꠁꠔꠅ ꠜꠝꠞ ꠙꠣꠈꠤꠄ ꠉꠣꠘ ꠉꠣꠁꠔꠅ।
ꠅꠟꠣ ꠎꠥꠖꠤꠘ ꠇꠞꠤꠀ ꠖꠤꠔꠅ ꠙꠣꠞꠦ ꠔꠦ ꠔꠣꠞ ꠙꠥꠀꠞ ꠐꠣꠁꠘ ꠔꠥꠝꠣꠞ ꠙꠥꠞꠤ ꠛꠤꠀ ꠖꠤꠛꠣꠄ। ꠅꠘꠦ ꠔꠣꠁꠘ ꠇꠁꠟꠣ ꠑꠤꠇ ꠀꠍꠦ। ꠅꠃ ꠝꠣꠟꠥꠘꠤ ꠛꠦꠐꠤꠄ ꠁꠇꠣꠘ ꠔꠣꠞ ꠝꠣꠄ ꠢꠥꠘꠤꠀ ꠀꠁꠟꠅ, ꠀꠁꠀ ꠇꠁꠟꠞꠦ ꠙꠥꠔ ꠅꠟꠣ ꠅꠟꠣ ꠛꠣꠖꠡꠣꠢꠦ ꠇꠁꠍꠁꠘ। ꠛꠥꠟꠦ ꠉꠤꠀ ꠛꠣꠖꠡꠣꠢꠞꠦ ꠇꠃ ꠡꠛꠔꠣ ꠇꠝꠙꠤꠟꠤꠐ ꠅꠁꠛꠅ, ꠔꠣꠘ ꠙꠥꠞꠤ ꠈꠣꠟꠤ ꠛꠤꠀ ꠖꠤꠔꠣ ꠎꠥꠖꠤꠘ ꠝꠔ ꠇꠞꠁꠘ ꠔꠦ ꠀꠝꠤ ꠖꠤꠝꠥ ꠁꠇꠍꠣꠁꠘ ꠇꠞꠤꠀ।
ꠅꠘ ꠝꠣꠄ ꠌꠤꠘ꠆ꠔꠣ ꠜꠣꠛꠘꠣ ꠇꠞꠦꠞ ꠎꠦ ꠇꠤꠟꠣꠞꠦ ꠙꠥꠔ ꠁꠔꠣ ꠇꠞꠛꠣꠄ। ꠛꠥꠟꠦ ꠀꠝꠤ ꠎꠦꠟꠣ ꠇꠞꠤ ꠇꠞꠝꠥ ꠁ ꠌꠤꠘ꠆ꠔꠣꠞ ꠔ ꠔꠥꠝꠣꠞ ꠖꠞꠇꠣꠞ ꠘꠣꠄ ꠕꠣꠇꠟꠦ ꠛꠣꠖꠡꠣꠢꠞꠦ ꠇꠃ ꠛꠣꠖꠡꠣꠢꠞ ꠙꠥꠞꠤ ꠛꠤꠀ ꠖꠤꠛꠣꠘꠤ? ꠅꠘꠦ ꠛꠣꠖꠡꠣꠢ ꠞꠣꠎꠤ ꠅꠁꠍꠁꠘ। ꠅꠘꠦ ꠞꠣꠁꠔꠇꠥꠞ ꠜꠤꠔꠞꠦ ꠅꠃ ꠔꠣꠞ ꠀꠋꠐꠤ ꠙꠣꠇ꠆ꠇꠣꠞ ꠝꠣꠎꠦ ꠊꠡꠣ ꠖꠤꠍꠦ, ꠅꠘꠦ ꠙꠞꠤ ꠢꠇꠟ ꠀꠁꠍꠁꠘ ꠇꠁꠍꠦ ꠀꠝꠣꠞ ꠅꠟꠣ ꠅꠟꠣ ꠅꠁꠔꠅ, ꠅꠃ ꠎꠦ ꠝꠔꠘ ꠇꠁꠍꠤꠟ ꠅꠃ ꠝꠔꠘ ꠖꠥꠗꠞ ꠖꠤꠊꠤ ꠅꠁꠍꠦ, ꠔꠦꠟꠞ ꠖꠤꠊꠤ ꠅꠁꠍꠦ, ꠚꠥꠟꠞ ꠛꠣꠉꠣꠘ ꠅꠁꠍꠦ ꠔꠣꠞ ꠛꠣꠠ ꠕꠣꠇꠤ ꠛꠣꠖꠡꠣꠢꠞ ꠛꠣꠠꠤꠄ ꠡꠥꠘꠣꠞ ꠎꠣꠋꠉꠣꠟ ꠅꠁꠍꠦ।
ꠅꠘꠦ ꠛꠣꠖꠡꠣꠢꠦ ꠔ ꠞꠣꠁꠔ ꠙꠥꠀꠁꠍꠦ ꠖꠦꠈꠤꠀ ꠛꠣꠖꠡꠣꠢꠦ ꠅꠛꠣꠇ ꠟꠣꠉꠤꠉꠦꠍꠁꠘ ꠎꠦ ꠁꠟꠣ ꠇꠤꠟꠣ ꠇꠞꠟꠅ। ꠅꠘꠦ ꠔꠣꠘ ꠙꠥꠞꠤ ꠔꠣꠘ ꠁꠌ꠆ꠍꠣꠝꠔꠅ ꠛꠦꠐꠤꠞ ꠙꠥꠀꠐꠣꠁꠘ ꠛꠤꠀ ꠖꠤꠍꠁꠘ। ꠅꠘꠦ ꠎꠦ ꠛꠤꠀ ꠖꠤꠍꠁꠘ ꠛꠤꠀ ꠖꠦꠅꠀꠞ ꠙꠞꠦ ꠅꠘꠦ ꠔꠣꠘ ꠙꠥꠞꠤ ꠁꠉꠥ ꠈꠣꠁꠍꠟꠔ ꠜꠣꠟꠣ ꠘꠣꠄ। ꠅꠘꠦ ꠔꠣꠘ ꠙꠥꠞꠤꠄ ꠇꠤꠔꠣ ꠇꠞꠍꠦ ꠔꠣꠁꠞ ꠀꠞꠅ ꠎꠣꠝꠣꠁ ꠀꠍꠦ ꠡꠣꠔꠉꠥ। ꠅꠘꠦ ꠁꠔꠣ ꠔ ꠀꠞ ꠎꠣꠘꠦꠞꠘꠣ ꠇꠦꠃ, ꠅꠘꠦ ꠘꠣ ꠎꠣꠘꠣꠞ ꠙꠞꠦ ꠢꠦꠔꠅ ꠛꠤꠀ ꠇꠞꠤꠀ ꠀꠘꠍꠦ ꠅꠘꠦ ꠎꠤꠇꠣꠄ ꠈꠣꠟꠤ ꠔꠣꠞꠦ ꠛꠥꠟꠦ ꠙꠥꠘꠅ, ꠔꠥꠝꠤ ꠎꠦꠘꠅ ꠀꠉꠦ ꠔꠥꠝꠣꠞ ꠝꠣꠄ ꠇꠣꠝ ꠇꠞꠔꠣ ꠀꠞ ꠄꠛꠟꠣ ꠎꠦꠘꠅ ꠔꠥꠝꠣꠞ ꠅꠔꠐꠥꠇ ꠅꠁꠟꠅ ꠇꠤꠔꠣꠞ ꠖꠣꠘꠤ ꠅꠁꠟꠅ ?
ꠅꠇꠣꠘꠔꠣ ꠀꠝꠣꠞ ꠐꠣꠁꠘ ꠇꠁꠟꠣꠃ ꠌꠣꠁ, ꠅꠘꠦꠔꠅ ꠝꠣꠁꠘꠡꠦ ꠇꠁꠍꠦ ꠔꠤꠞꠤ ꠔꠣꠛꠤ7.25 ꠝꠘꠞ ꠇꠕꠣ ꠇꠁꠟꠦ ꠢꠐꠣꠔ ꠝꠞꠘ ꠅꠘꠦ ꠡꠛ ꠔꠤꠞꠤꠔꠅ ꠀꠞ ꠔꠤꠞꠤ ꠘꠣꠄ। ꠅꠘꠦ ꠢꠦ ꠃꠑꠤꠀ ꠇꠄ ꠘꠣ ꠁꠇꠣꠘꠔꠅ ꠀꠞ ꠇꠅꠀꠞ ꠇꠕꠣ ꠘꠣꠄ ꠁꠔꠣ ꠀꠝꠣꠞ ꠄꠇ ꠀꠟ꠆ꠟꠣꠞ ꠢꠥꠇꠥꠝꠦꠃ ꠀꠝꠣꠞ ꠅꠁꠍꠦ, ꠛꠥꠟꠦ ꠘꠣ ꠁꠟꠣ ꠘꠣꠄ। ꠔꠥꠝꠤ ꠢꠣꠍꠣ ꠇꠕꠣ ꠇꠃ ꠔꠦ ꠔꠥꠝꠣꠞ ꠀꠋꠐꠤ ꠎꠦꠘꠦ ꠀꠔꠅ ꠁꠇꠐꠣ, ꠁꠇꠐꠣ ꠇꠤꠀꠘꠅ ꠙꠣꠁꠟꠣꠄ। ꠅꠘꠦ ꠔꠣꠁꠘ ꠛꠃꠐꠣꠁꠘ ꠀꠡ꠆ꠔꠦ ꠀꠡ꠆ꠔꠦ ꠡꠛꠔꠣ ꠇꠁꠖꠤꠍꠁꠘ।
ꠅꠘꠦ ꠇꠁꠔꠦ ꠛꠃꠄ ꠇꠁꠍꠁꠘ ꠀꠁꠌ꠆ꠍꠣ ꠑꠤꠇ ꠀꠍꠦ ꠔꠥꠝꠤ ꠀꠞ ꠅꠃ ꠀꠋꠐꠤꠐꠣ ꠀꠝꠣꠞ ꠢꠣꠔꠅ ꠔꠣꠇꠃꠇꠖꠘꠥ ꠔꠥꠝꠤꠔꠅ ꠀꠞ ꠁꠛꠣꠄ ꠢꠤꠛꠣꠄ ꠎꠣꠁꠛꠣꠄꠉꠤ, ꠔꠦ ꠀꠋꠐꠤꠐꠣ ꠀꠝꠣꠞ ꠢꠣꠔꠅ ꠞꠣꠈꠤꠖꠦꠁ, ꠇꠞꠤ ꠔꠣꠁꠘ ꠞꠣꠈꠤꠌ꠆ꠍꠁꠘ। ꠅꠘ ꠔꠣꠁꠘ ꠇꠁꠍꠁꠘ ꠎꠦ ꠅꠃ ꠀꠋꠐꠤ ꠎꠥꠖꠤꠘ ꠀꠉꠘꠤꠞ ꠔꠎꠅ ꠗꠞꠅ ꠔꠦ ꠅꠟꠣ ꠅꠟꠣ ꠙꠞꠤ ꠃꠞꠤ ꠀꠁꠛꠣ ꠀꠁꠟꠦ ꠎꠥꠖꠤꠘ ꠔꠥꠝꠤ ꠎꠦꠇꠐꠣ ꠇꠁꠛꠣꠄ ꠌꠣꠁꠛꠣꠄ ꠅꠇꠐꠅ ꠅꠁꠛꠅ ꠄꠞ ꠛꠣꠖꠦ ꠎꠥꠖꠤꠘ ꠙꠣꠇ꠆ꠇꠣꠔ ꠊꠡꠣ ꠖꠦꠃ ꠙꠣꠕꠞꠅ ꠊꠡꠣ ꠖꠤꠟꠦ ꠔꠃ ꠖꠦꠃꠖꠣꠘꠅ ꠀꠁꠛꠣ ꠔꠥꠝꠤ ꠎꠦꠇꠐꠣ ꠇꠁꠛꠣꠄ ꠅꠇꠐꠅ ꠅꠁꠛꠅ। ꠅꠘꠦ ꠁ ꠇꠕꠣꠔꠅ ꠛꠦꠐꠤꠄ ꠢꠥꠘꠌꠦ ꠢꠥꠘꠤꠀ ꠔꠣꠁꠘ ꠉꠦꠍꠁꠘꠉꠤ ꠢꠞꠤꠀ ꠎꠣꠁꠔꠦꠃ ꠛꠦꠐꠤꠄ ꠊꠡꠣ ꠖꠤꠍꠦ ꠖꠤꠀ ꠇꠁꠍꠦ ꠅꠃ ꠄꠞꠣ ꠀꠁꠀ ꠇꠁꠍꠁꠘ, ꠇꠁꠍꠦ ꠎꠤꠇꠣꠁꠍꠦ ꠛꠥꠟꠦ ꠀꠋꠐꠤ ꠔꠥꠝꠤ ꠇꠣꠞ ꠛꠥꠟꠦ ꠎꠣꠞ ꠢꠣꠔꠅ ꠀꠁꠍꠤ ꠔꠣꠞ।
ꠛꠥꠟꠦ ꠎꠣꠞ ꠢꠣꠔꠅ ꠀꠁꠍꠅ ꠔꠣꠞ ꠎꠈꠘ ꠔꠦ ꠅꠃ ꠎꠦꠘꠦ ꠡꠣꠔꠉꠥ ꠛꠦꠐꠣ ꠀꠍꠦ ꠡꠣꠔꠅꠉꠥ ꠛꠦꠐꠣ ꠖꠤꠀ ꠀꠞ ꠀꠝꠣꠞꠦꠖꠤ ꠎꠟꠔꠞꠋꠉꠅ ꠘꠖꠤꠞ ꠙꠣꠘꠤꠞ ꠔꠟꠦ ꠄꠇꠐꠣ ꠝꠘ꠆ꠖꠤꠞ ꠛꠣꠘꠣꠁꠀ ꠅꠘꠅ ꠀꠝꠣꠞꠦ ꠄꠇꠐꠣ ꠎꠣꠉꠣꠞ ꠁꠅ ꠇꠞꠤꠀ ꠖꠤꠟꠣꠁꠛꠣꠄ।ꠅꠘꠦꠔꠅ ꠇꠕꠣꠞ ꠟꠉꠦꠃ ꠅꠁꠉꠦꠍꠦ ꠅꠘꠦ ꠀꠞ ꠎꠣꠝꠣꠁ ꠀꠞ ꠇꠤꠔꠣ ꠎꠣꠝꠣꠁꠔꠅ ꠀꠞ ꠇꠥꠘꠔꠣ ꠟꠣꠉꠦꠞꠅ ꠘꠣ ꠔꠣꠁꠘ ꠅꠃ ꠛꠦꠐꠣꠁꠘ ꠔꠞꠦ ꠖꠤꠀ ꠀꠞ ꠔꠣꠁꠘ ꠎꠟꠔꠞꠋꠉꠅ ꠘꠖꠤꠞ ꠔꠟꠦ ꠄꠇꠐꠣ ꠝꠘ꠆ꠖꠤꠞ ꠛꠣꠘꠣꠁꠀ ꠖꠤꠍꠦ ꠀꠞ ꠔꠣꠁꠘ ꠢꠘꠅ ꠉꠦꠍꠁꠘꠉꠤ।
ꠛꠦꠐꠣ ꠀꠁꠍꠦ ꠛꠣꠠꠤ ꠔꠘꠦ ꠀꠞ ꠛꠦꠐꠣꠞ ꠛꠃ ꠘꠣꠁ। ꠛꠃꠅ ꠘꠣꠄ ꠀꠋꠐꠤꠅ ꠘꠣꠄ। ꠅꠘꠦ ꠇꠤꠔꠣ ꠇꠞꠛꠅ ꠀꠋꠐꠤꠔꠅ ꠛꠦꠐꠤꠞ ꠢꠣꠔꠅ ꠖꠤꠍꠟꠣ ꠛꠦꠐꠤꠄ ꠘꠤꠍꠦꠉꠤ। ꠅꠘꠦꠔꠅ ꠔꠣꠁꠘ ꠇꠞꠣꠞ ꠀꠞ ꠇꠤꠌ꠆ꠍꠥ ꠘꠣꠁ ꠅꠃ ꠔꠣꠁꠘ ꠌꠤꠘ꠆ꠔꠣ ꠇꠞꠞꠣ ꠀꠞ ꠇꠣꠘꠞꠣ।
 ){kind=link}
0 Comments