foshu fakire maya korle Allah shajjo koroin (Story Part-III) 


ꠅꠘꠦ ꠛꠣꠖꠡꠣꠢꠦ ꠃꠑꠤꠀ ꠇꠁꠘ, ꠛꠣꠖꠡꠣꠢꠞ ꠛꠣꠠꠤ ꠉꠦꠍꠁꠘ ꠈꠥꠎ ꠇꠞꠤꠀ ꠅꠘ ꠛꠣꠖꠡꠣꠢꠦ ꠇꠁꠍꠦ ꠢꠥꠘꠅ, ꠀꠝꠣꠞ ꠙꠥꠞꠤ ꠔꠥꠝꠤ ꠝꠣꠞꠤꠀ ꠚꠣꠟꠣꠁꠍꠅ ꠇꠤ ꠇꠤꠔꠣ ꠇꠞꠍꠅ ꠀꠝꠣꠞ ꠙꠥꠞꠤ ꠖꠦꠃ ꠔꠥꠝꠣꠞꠦ ꠡꠣꠔ ꠖꠤꠘꠞ ꠡꠝꠄ ꠖꠤꠟꠣꠝ ꠀꠘ꠆ꠘꠣꠄ ꠔꠥꠝꠣꠞ ꠝꠣ ꠡꠁꠖ꠆ꠗꠣ ꠔꠥꠝꠣꠞꠦ ꠉꠞꠖꠘ ꠖꠤꠟꠣꠁꠝꠥ। ꠅꠘꠔꠅ ꠔꠣꠞ ꠀꠋꠐꠤ ꠘꠣꠁ ꠎꠦ ꠀꠝꠤ ꠄꠈꠣꠘ ꠇꠁꠔꠣ ꠙꠣꠞꠛꠣ ꠄꠈꠣꠘ ꠇꠞꠔꠣ ꠙꠣꠞꠛꠣ ꠇꠤꠌ꠆ꠍꠥꠅ ꠘꠣꠄ, ꠅꠃ ꠛꠦꠐꠣꠄ ꠇꠤꠔꠣ ꠇꠞꠍꠦ ꠔꠤꠘ ꠖꠤꠘꠞ ꠖꠤꠘ ꠔꠣꠞ ꠅꠃ ꠎꠦꠘꠅ ꠄꠇꠐꠣ ꠌꠤꠟ ꠀꠍꠤꠟ, ꠌꠤꠟꠞꠦ, ꠃꠖꠞꠦ ꠀꠞ ꠛꠤꠟꠣꠁꠞꠦ, ꠘꠦꠃꠟꠞꠦ ꠄꠇꠐꠣ ꠈꠡꠤ ꠎꠛꠅ ꠇꠞꠍꠦ ꠇꠞꠤꠀ ꠄꠞꠣꠞꠦꠅ ꠈꠣꠛꠣꠁꠍꠦ ꠈꠣꠛꠣꠁꠀ ꠛꠦꠐꠣꠄꠅ ꠈꠣꠁꠍꠦ, ꠈꠣꠁꠀ ꠈꠁꠟꠅ ꠛꠥꠟꠦ ꠞꠦ ꠔꠥꠝꠒꠣꠞꠦꠔꠅ ꠀꠝꠤ ꠙꠣꠟꠍꠤꠟꠣꠝ ꠔꠥꠝꠒꠣ ꠢꠦꠝꠣꠘ ꠎꠣꠔꠤꠅ ꠕꠣꠇꠟꠦ ꠀꠝꠣꠞ ꠖꠥꠈ ꠛꠥꠎꠛꠣꠄ। ꠝꠣꠘꠥꠡꠦ ꠀꠝꠣꠞ ꠖꠥꠈ ꠛꠥꠌ꠆ꠍꠦꠘꠣ। ꠔꠥꠝꠒꠣꠞꠦ ꠀꠝꠤ ꠙꠣꠟꠍꠤꠟꠣꠝ ꠙꠣꠟꠤꠀ ꠈꠣꠛꠣꠁꠀ ꠅꠃ ꠖꠤꠘ ꠗꠞꠤ ꠎꠔꠘ ꠇꠞꠍꠤ, ꠀꠞ ꠅꠘꠦ ꠀꠝꠣꠞ ꠛꠤꠙꠗ ꠀꠝꠣꠞꠦꠔꠅ ꠛꠣꠖꠡꠣꠢꠦ ꠉꠞꠖꠘ ꠖꠤꠟꠣꠁꠛꠅ ꠔꠦ ꠔꠥꠝꠒꠣꠞꠦ ꠛꠘ꠆ꠖꠤ ꠞꠣꠈꠤꠀ ꠟꠣꠜ ꠘꠣꠄ।


ꠔꠥꠝꠤꠔꠣꠁꠘ ꠎꠣꠞ ꠔꠣꠞ ꠛꠣꠡꠣꠄ ꠛꠣꠡꠣꠄ ꠎꠣꠞ ꠔꠣꠞ ꠎꠣꠃꠉꠤ ꠅꠘꠦꠔꠅ ꠔꠥꠝꠤꠔꠣꠁꠘ ꠛꠠꠅ ꠅꠁꠉꠦꠍꠅ। ꠅꠘꠦꠔꠅ ꠇꠦꠃ ꠝꠣꠞꠔꠅ ꠙꠣꠞꠔꠅ ꠘꠣꠄ ꠀꠞ ꠀꠝꠣꠞ ꠉꠞꠖꠘꠔꠅ ꠛꠣꠖꠡꠣꠢꠦ ꠖꠤꠟꠣꠁꠛꠣ ꠇꠦꠘꠦ ꠛꠣꠖꠡꠣꠢꠞ ꠙꠥꠞꠤ ꠀꠝꠤ ꠔꠥꠇꠣꠁꠀ ꠖꠤꠔꠣꠝ ꠙꠣꠞꠔꠣꠝ ꠘꠣꠄ ꠔꠦ ꠀꠞ ꠉꠞꠖꠘ ꠅꠁꠎꠤꠛꠅ ꠘꠣꠘꠤ। ꠔꠥꠝꠤ ꠔꠣꠁꠘ ꠎꠣꠃꠉꠤ। ꠅꠘꠦ ꠔꠣꠞꠦ ꠌꠣꠁꠞꠅ ꠎꠘ ꠄꠇ ꠎꠣꠉꠣꠔ ꠖꠟꠣ ꠅꠁꠀ ꠇꠁꠟꠅ ꠛꠥꠟꠦꠞꠦ ꠜꠣꠁ ꠢꠥꠘ, ꠁ ꠝꠣꠁꠘꠡꠦ ꠀꠝꠒꠣꠞꠦ ꠎꠔꠘ ꠇꠞꠤ ꠙꠣꠟꠍꠦ ꠀꠞ ꠝꠣꠞꠤꠟꠤꠔꠅ ꠀꠍꠤꠟ ꠢꠥꠞꠥꠔꠣꠁꠘ꠆ꠔꠦ, ꠀꠘꠤꠀ ꠙꠣꠟꠤꠀ ꠅꠔꠅ ꠛꠠꠅ ꠇꠞꠍꠦ ꠇꠞꠤꠀ ꠀꠝꠒꠣꠞꠦ ꠈꠣꠛꠣꠁꠀ ꠛꠠꠅ ꠇꠞꠍꠦ। ꠀꠞ ꠅꠈꠘꠇꠥ ꠔꠣꠞ ꠛꠤꠙꠖꠞ ꠇꠣꠟꠅ ꠎꠥꠖꠤꠘ ꠀꠝꠞꠣ ꠡꠣꠁꠎ꠆ꠎ ꠘꠣ ꠇꠞꠤ ꠔꠦ ꠀꠞ ꠀꠝꠒꠣ ꠇꠤꠔꠣꠞ ꠟꠣꠉꠤ ꠁ ꠝꠣꠁꠘꠡꠞ ꠈꠣꠘꠤꠔ ꠛꠣꠠ ꠕꠣꠇꠤ ꠀꠝꠒꠣꠞꠦ ꠈꠣꠛꠣꠁꠀ ꠛꠠꠅ ꠇꠞꠍꠦ, ꠔꠦ ꠀꠝꠞꠣ ꠖꠦꠈꠤ।

ꠃꠖꠞꠦ ꠇꠁꠟꠅ ꠎꠣ ꠙꠣꠘꠤꠞ ꠔꠟ ꠀꠍꠦ ꠔꠥꠝꠤ ꠖꠦꠈꠛꠣꠄ ꠀꠞ ꠎꠣ ꠉꠣꠃ ꠉꠦꠞꠣꠝ ꠀꠍꠦ ꠌꠤꠟꠦ ꠇꠁꠟꠅ ꠡꠛ ꠎꠣꠉꠣ ꠀꠝꠤ ꠖꠦꠈꠝꠥ ꠀꠞ ꠛꠤꠟꠣꠁꠞꠦ ꠇꠁꠟꠞꠦ ꠜꠣꠁ ꠝꠣꠁꠘꠡꠞ ꠃꠘ꠆ꠖꠣꠟ-ꠚꠣꠘ꠆ꠖꠣꠟ ꠃꠉꠣꠞ-ꠡꠥꠉꠣꠞ ꠀꠍꠦ ꠔꠥꠁ ꠖꠦꠈꠛꠦ, ꠀꠞ ꠘꠦꠃꠟꠦ ꠇꠁꠟꠅ ꠉꠣꠔ ꠇꠥꠔ ꠎꠣ ꠀꠍꠦ ꠡꠛ ꠀꠝꠤ ꠖꠦꠈꠝꠥ, ꠖꠦꠈꠤꠀ ꠀꠝꠞꠣ ꠍꠄ ꠖꠤꠘꠞ ꠜꠤꠔꠞꠦ ꠡꠛ ꠅꠃ ꠎꠣꠉꠣꠔ ꠀꠁꠀ ꠖꠟꠣ ꠅꠁꠝꠥ। ꠙꠣꠁꠟꠦꠔꠅ ꠙꠣꠁꠍꠅ ꠘꠣ ꠙꠣꠁꠟꠦ ꠅꠃ ꠎꠣꠉꠣꠔ ꠀꠁꠛꠣꠄ। ꠇꠞꠤ ꠔꠣꠞꠣ ꠌꠣꠁꠞ ꠎꠘ ꠌꠣꠁꠞ ꠛꠣꠄ ꠛꠣꠞꠁꠍꠦ। ꠔꠃ ꠃꠖꠦ ꠡꠛ ꠘꠖꠤ ꠘꠣꠟꠣ ꠎꠔꠅ ꠀꠍꠤꠟ ꠖꠦꠈꠔꠦ ꠖꠦꠈꠔꠦ ꠇꠥꠘꠥ ꠎꠣꠉꠣꠔ ꠘꠣ ꠙꠣꠁꠀ ꠎꠟꠔꠞꠋꠉꠅ ꠘꠖꠤꠔ ꠛꠥꠠ ꠖꠤꠍꠦ ꠖꠤꠀ ꠖꠦꠈꠦ ꠄꠇꠐꠣ ꠝꠘ꠆ꠖꠤꠞ, ꠅꠘꠦ ꠃꠖꠄ ꠈꠣꠝꠞꠣꠁꠀ ꠝꠘ꠆ꠖꠤꠞꠅ ꠖꠞꠅꠎꠣ ꠛꠣꠋꠉꠤꠟꠤꠍꠦ।

ꠛꠣꠋꠉꠤꠀ ꠖꠦꠈꠦ ꠎꠦ ꠡꠣꠔꠉꠥ ꠛꠦꠐꠣ ꠊꠥꠝꠅ ꠛꠦꠐꠤꠅ ꠊꠥꠝꠅ ꠀꠞ ꠀꠋꠐꠤꠐꠣ ꠐꠦꠛꠥꠟꠞ ꠃꠙꠞꠦ ꠈꠥꠟꠣ, ꠅꠃ ꠃꠖꠦ ꠇꠤꠔꠣ ꠇꠞꠍꠦ ꠈꠣꠝꠞ ꠝꠣꠞꠤ ꠀꠋꠐꠤꠐꠣ ꠟꠁꠀ ꠛꠣꠠꠁꠀ ꠀꠁꠌ꠆ꠍꠦ। ꠛꠣꠠꠁꠀ ꠀꠁꠀ ꠎꠦꠔꠇꠥ ꠃꠖ ꠛꠣꠁꠔꠅ ꠄꠞ ꠡꠝꠄ ꠄꠇ ꠉꠥꠀꠟꠦ ꠘꠤꠍꠦꠉꠤ। ꠔꠃ ꠉꠥꠀꠟꠦ ꠎꠦꠔꠇꠥ ꠈꠣꠁꠟꠤꠍꠦ ꠀꠞ ꠅꠃꠖꠤꠘꠇꠥ ꠝꠣꠁꠝꠟꠞ ꠛꠃꠄ ꠇꠁꠍꠦ ꠀꠁꠎꠇꠦ ꠎꠦ ꠛꠠꠅ ꠝꠣꠍꠐꠣ ꠃꠑꠛꠅ ꠁ ꠝꠣꠍꠐꠣ ꠀꠘꠛꠣꠄ ꠀꠝꠞꠣ ꠞꠣꠘ꠆ꠖꠤꠀ ꠈꠣꠁꠔꠣꠝ। ꠀꠞ ꠅꠃ ꠉꠥꠀꠟꠐꠣ ꠎꠦ ꠀꠋꠐꠤꠞ ꠝꠥꠈꠅ ꠉꠥꠀꠟ ꠃꠑꠤꠉꠦꠍꠦ ꠝꠣꠁꠝꠟꠞ ꠎꠣꠟꠅ। ꠅꠘ ꠎꠣꠟꠅ ꠃꠑꠔꠦꠃ ꠔꠦꠃ ꠃꠖꠦ ꠖꠦꠈꠍꠦ ꠎꠦ ꠅꠃ ꠝꠣꠁꠝꠟꠦ ꠉꠥꠀꠟꠐꠣ ꠝꠣꠞꠍꠦ।ꠅꠘꠦ ꠉꠥꠀꠟ ꠙꠣꠁꠀ ꠝꠣꠁꠝꠟꠦ ꠇꠞ ꠘꠣ ꠀꠁꠎ ꠀꠞ ꠝꠣꠍ ꠝꠣꠞꠣ ꠘꠣ, ꠀꠝꠣꠞ ꠛꠃꠄ ꠇꠁꠍꠦ ꠁꠇꠐꠣ ꠞꠣꠘ꠆ꠖꠤꠀ ꠇꠣꠁꠔꠅ ꠔꠦ ꠀꠁꠎ ꠁꠇꠐꠣ ꠛꠣꠠꠤꠔ ꠟꠁꠀ ꠎꠣꠁꠉꠤ।

ꠅꠘꠦ ꠅꠃ ꠝꠣꠍꠐꠣ ꠟꠁꠀ ꠛꠣꠠꠤꠔ ꠀꠁꠍꠦ। ꠅꠘꠦ ꠃꠖ ꠀꠁꠍꠦ ꠖꠃꠞꠤꠀ ꠀꠁꠀ ꠇꠄꠞꠦ ꠜꠣꠁ ꠀꠝꠤꠔꠅ ꠀꠋꠐꠤ ꠀꠘꠤꠟꠤꠍꠟꠣꠝ ꠀꠘꠤꠀ ꠅꠟꠣ ꠅꠟꠣ ꠊꠐꠘꠣ, ꠔꠦ ꠛꠤꠟꠣꠁ ꠔꠥꠁ ꠎꠣ, ꠔꠥꠁ ꠙꠣꠞꠛꠦ ꠛꠦꠐꠤꠄ ꠎꠦꠔꠇꠥ ꠟꠥꠟꠤ ꠇꠣꠐꠤꠀ ꠕꠁꠛꠅ ꠅꠃ ꠡꠝꠄ ꠟꠥꠟꠤꠐꠣ ꠟꠁꠀ ꠔꠥꠁ ꠖꠃꠞꠤꠀ ꠀꠁꠛ꠆ꠛꠦ ꠀꠞ ꠔꠞ ꠗꠣꠞꠣ ꠅꠁꠛꠅ ꠀꠘ꠆ꠘꠣꠁꠟꠦ ꠀꠞ ꠇꠥꠘꠥ ꠟꠣꠈꠣꠘ ꠅꠁꠔꠅ ꠘꠣꠄ। ꠅꠘꠦ ꠛꠦꠐꠣꠄ ꠎꠦꠘ ꠝꠣꠍ ꠟꠁꠀ ꠀꠞ, ꠛꠤꠟꠣꠁꠄ ꠝꠦꠃ ꠝꠦꠃ ꠒꠣꠇꠤꠀ ꠛꠦꠐꠣꠣꠞ ꠟꠉꠦ ꠙꠕ ꠖꠤꠟꠣꠁꠍꠦ। ꠅꠘꠦ ꠝꠣꠁꠝꠟꠦ ꠇꠞꠞꠦ ꠛꠤꠟꠣꠁ ꠝꠣꠍꠔꠅ ꠝꠣꠞꠍꠤ ꠔꠥꠁ ꠄꠇ ꠐꠥꠇꠞꠣ ꠈꠣꠁꠛꠦ ꠝꠣꠘꠣꠁꠛꠣꠞ ꠀꠉꠦ ꠛꠦꠃꠡ ꠅꠁꠟꠦ ꠇꠦꠘꠦ, ꠔꠦ ꠎꠣ ꠝꠣꠘꠣꠁ ꠖꠦꠘꠦ।

ꠅꠘꠦ ꠛꠦꠐꠤꠄ ꠝꠣꠍ ꠝꠣꠘꠣꠁꠔꠦꠃ ꠇꠁꠍꠦ ꠝꠣꠍ ꠛꠤꠠꠣꠘ ꠇꠞꠛꠣꠄ ꠛꠤꠟꠣꠁꠞꠦ ꠄꠇ ꠐꠥꠇꠞꠣ ꠝꠣꠍ ꠖꠤ ꠜꠣꠔ ꠇꠣꠛꠣꠁꠛꠣꠄ, ꠛꠦꠐꠤꠄ ꠝꠣꠍ ꠛꠣꠘꠣꠞ ꠛꠤꠟꠣꠁꠄ ꠈꠣꠘ꠆ꠖꠣꠔ ꠛꠁꠍꠦ, ꠛꠁꠀ-ꠃꠁꠀ ꠛꠦꠐꠤꠄ ꠟꠥꠟꠤꠐꠣ ꠈꠟ꠆ꠟꠣ ꠕꠣꠇꠤ ꠀꠉꠟꠣꠁꠀ ꠕꠁꠔꠦꠃ ꠛꠤꠟꠣꠁꠄ ꠏꠣꠙꠐꠣ ꠝꠣꠞꠤ ꠟꠥꠟꠤꠐꠣ ꠟꠁꠀ ꠛꠤꠟꠣꠁꠄ ꠖꠃꠞ ꠖꠤꠟꠣꠁꠍꠦ। ꠅꠘꠦ ꠛꠦꠐꠤꠄ ꠇꠄꠞꠦ ꠛꠤꠟꠣꠁ ꠟꠥꠟꠤꠖꠤ ꠇꠤꠔꠣ ꠇꠞꠛꠦ ꠇꠤ ꠙꠦꠐ ꠜꠞꠛꠅ ꠔꠥꠁ ꠄꠇ ꠐꠥꠞꠣ ꠝꠣꠍ ꠈꠣꠁꠀ ꠎꠣ। ꠅꠘ ꠢꠦ ꠀꠞ ꠝꠣꠍ ꠈꠣꠁꠔꠅ ꠇꠤꠔꠣ ꠔꠣꠞꠔꠅ ꠟꠥꠟꠤꠞ ꠖꠞꠇꠣꠞ ꠅꠘꠦ ꠟꠥꠟꠤ ꠟꠁꠀ ꠛꠤꠟꠣꠁ ꠀꠁꠌ꠆ꠍꠦ ꠖꠃꠞꠤꠀ, ꠀꠁꠀ ꠔꠣꠞꠣ ꠅꠃ ꠎꠦꠘꠅ ꠔꠤꠘ ꠞꠣꠡ꠆ꠔꠣꠞ ꠝꠥꠈ ꠕꠣꠇꠤ ꠌꠣꠁꠞ ꠎꠘ ꠌꠣꠁꠞ ꠛꠣꠄ ꠉꠦꠍꠟꠣ ꠅꠃ ꠅꠘꠅ ꠖꠟꠣ ꠅꠁꠍꠁꠘ। ꠅꠁꠀ ꠀꠞ ꠅꠃ ꠀꠋꠐꠤꠐꠣ ꠃꠖꠞ ꠝꠥꠈꠅ ꠟꠁꠍꠦ ꠈꠣꠝꠞ ꠝꠣꠞꠤ, ꠟꠁꠀ ꠀꠞ ꠔꠣꠞꠣ ꠒꠣꠇꠤ ꠒꠣꠇꠤ ꠔꠣꠞꠣ ꠅꠃ ꠝꠣꠟꠥꠘꠤ ꠛꠦꠐꠤꠞ ꠙꠥꠅꠀꠞ ꠛꠣꠠꠤꠔ ꠀꠁꠍꠦ।

ꠀꠁꠔꠦꠃ ꠅꠘꠦ ꠛꠦꠐꠣꠄ ꠙꠥꠀꠄ ꠌꠣꠁꠀ ꠖꠦꠈꠍꠦ ꠎꠦ ꠔꠣꠞ ꠃꠖꠞ ꠝꠥꠈꠅ ꠀꠋꠐꠤ। ꠅꠘꠦ ꠃꠖꠞꠦ ꠇꠥꠟꠅ ꠟꠁꠀ ꠔꠣꠞ ꠀꠋꠐꠤꠐꠣ ꠢꠣꠔꠅ ꠟꠁꠀ ꠀꠞꠛꠣꠞ ꠌꠣꠁꠞꠅ ꠙꠤꠘꠎꠤꠞꠣꠔ ꠜꠞꠍꠦ। ꠜꠞꠤꠀ ꠀꠞꠛꠣꠞ ꠄꠇꠐꠣ ꠈꠡꠤ ꠎꠛꠅ ꠇꠞꠤ ꠔꠣꠞꠣꠞꠦ ꠈꠣꠛꠣꠁꠀ ꠙꠤꠘꠎꠤꠞꠣꠄ ꠙꠤꠘꠎꠤꠞꠣꠄ ꠕꠁ ꠞꠣꠈꠍꠦꠅ ꠕꠁꠀ ꠢꠦ ꠀꠋꠐꠤꠔ ꠊꠡꠣ ꠖꠤꠍꠦ, ꠀꠋꠐꠤꠔ ꠊꠡꠣ ꠖꠤꠀ ꠇꠁꠍꠦ ꠖꠦꠃ ꠖꠣꠘꠛ ꠔꠥꠝꠤ ꠇꠣꠞ ? ꠛꠥꠟꠦ ꠎꠣꠞ ꠀꠔꠅ ꠀꠁꠍꠤ ꠔꠣꠞ। ꠛꠥꠟꠦ ꠔꠦ ꠀꠝꠣꠞ ꠇꠁꠘ꠆ꠘꠣ ꠎꠦꠘꠅ ꠀꠍꠦ, ꠇꠁꠘ꠆ꠘꠣꠞ ꠎꠣꠛꠔꠤ ꠎꠦꠔꠣꠃ ꠀꠍꠦ ꠡꠛ ꠡꠁꠖ꠆ꠗꠣ ꠀꠞ ꠛꠣꠡ꠆ꠡꠣꠞ ꠃꠑꠣꠘ ꠄꠇꠐꠣ ꠝꠘ꠆ꠖꠤꠞ ꠅꠁꠔꠅ ꠀꠞ ꠃꠐꠣꠘꠅ ꠡꠛ ꠀꠁꠔ꠆ꠔꠣ ꠇꠁꠍꠦ।

ꠅꠘꠦ ꠁ ꠇꠕꠣ ꠎꠦꠝꠘꠦ ꠇꠁꠍꠦ ꠅꠘꠦ ꠅꠃ ꠡꠣꠔ ꠖꠤꠘꠞ ꠖꠤꠘ, ꠁ ꠇꠕꠣ ꠎꠦꠝꠘꠦ ꠇꠁꠍꠦ ꠇꠁꠔꠦꠃ ꠄꠇꠐꠣ ꠝꠘ꠆ꠖꠤꠞ ꠅꠁꠉꠦꠍꠦ ꠛꠣꠖꠡꠣꠢꠞ ꠃꠑꠣꠘꠅ ꠀꠞ ꠢꠦꠞꠣ ꠔ ꠀꠞ ꠇꠁꠔꠣ ꠙꠣꠞꠞꠣꠘꠣ ꠔꠣꠞꠣ ꠘꠖꠤꠞ ꠝꠣꠎꠦ ꠙꠣꠘꠤꠞ ꠔꠟꠦ, ꠔꠣꠞꠣꠔꠅ ꠛꠥꠏꠞꠣ ꠔꠣꠞꠣꠞ ꠢꠘꠃ ꠀꠌꠁꠘ ꠊꠥꠝꠅ। ꠔꠣꠞꠣ ꠔ ꠁꠔꠣꠞ ꠛꠥꠗ ꠙꠣꠅꠀꠔ ꠘꠣꠄ। ꠅꠘꠦ ꠅꠘꠅ ꠀꠁꠌ꠆ꠍꠁꠘ ꠡꠛ। ꠅꠘꠦ ꠞꠣꠁꠔ ꠙꠥꠀꠁꠍꠦ ꠅꠘꠦꠇ ꠛꠦꠁꠟ ꠅꠁꠍꠦ ꠢꠥꠇꠞꠣꠘꠤ ꠛꠦꠐꠤꠞ ꠙꠥꠀꠔꠅ ꠀꠞ ꠃꠑꠞꠣꠘꠣ ꠎꠦ ꠃꠑꠤꠀ ꠖꠦꠈꠞꠣꠘꠣ ꠎꠦ ꠔꠣꠘ ꠑꠣꠘ ꠘꠣꠁ ꠅꠘꠇꠥ, ꠔꠣꠁꠘꠔꠅ ꠡꠣꠘ꠆ꠔꠤ ꠎꠦ ꠀꠁꠎ ꠔꠣꠘ ꠉꠞꠖꠘ ꠅꠁꠎꠤꠔꠅ। ꠅꠘ ꠛꠣꠖꠡꠣꠢ ꠃꠑꠍꠁꠘ ꠃꠑꠤꠀꠃ ꠔꠣꠘ ꠃꠎꠤꠞ ꠙꠣꠑꠣꠁꠀ ꠇꠁꠍꠁꠘ ꠖꠦꠈ ꠙꠥꠅꠀꠞꠦ ꠒꠣꠇ ꠖꠦ, ꠀꠁꠎ ꠀꠝꠣꠞ ꠙꠥꠞꠤ ꠎꠥꠖꠤꠘ ꠘꠣ ꠖꠤꠔꠅ ꠙꠣꠞꠦ ꠔꠣꠞ ꠡꠣꠔ ꠖꠤꠘꠞ ꠐꠣꠁꠝ ꠀꠍꠤꠟ ꠔꠦꠔꠅ ꠔꠣꠞ ꠡꠦꠡ, ꠀꠁꠎ ꠔꠣꠞ ꠉꠞꠖꠘ ꠖꠤꠟꠣꠁꠝꠥ।


ꠎꠦꠔꠇꠥ ꠇꠁꠍꠦ ꠉꠞꠖꠘ ꠖꠤꠟꠣꠁꠛꠅ ꠀꠡ꠆ꠔꠦ ꠀꠡ꠆ꠔꠦ ꠃꠎꠤꠞ ꠅꠇꠟ ꠀꠁꠍꠁꠘ ꠀꠁꠀ ꠔꠣꠞꠦ ꠒꠣꠇꠍꠁꠘ। ꠅꠘꠦ ꠢꠦ ꠇꠁꠍꠦ ꠅꠛꠣ ꠛꠦꠁꠟ ꠃꠁꠟ ꠅꠃꠇꠖꠦꠘꠅ ꠛꠣꠖꠡꠣꠞꠦ ꠇꠃ ꠞꠣꠎꠣ ꠛꠣꠖꠡꠣꠢ ꠖꠣꠅꠅꠔ ꠖꠤꠔꠣ ꠒꠥꠟ ꠝꠣꠞꠣꠁꠔꠣ ꠡꠛ ꠝꠣꠘꠥꠡ ꠀꠃꠇꠖꠘꠅ ꠔꠣꠘ ꠙꠥꠞꠤ ꠎꠦꠘꠅ ꠛꠣꠇꠞꠤ ꠖꠤꠔꠣꠝ ꠔ ꠡꠇꠟꠦ ꠖꠦꠈꠔꠦ ꠅꠁꠛꠅ। ꠅꠔꠈꠣꠘ ꠎꠦꠘꠅ ꠅꠁꠟꠅ ꠅꠘꠦ ꠡꠇꠟꠦꠔꠅ ꠖꠦꠈꠔꠅ ꠅꠁꠛꠅ ꠀꠝꠤ ꠡꠣꠔ ꠖꠤꠘꠦ ꠔꠥꠇꠣꠁꠀ ꠛꠣꠞ ꠇꠞꠍꠤ, ꠔꠦ ꠅꠘꠦ ꠛꠣꠖꠡꠣꠢꠞꠦ ꠇꠃ ꠇꠥꠘꠥ ꠌꠤꠘ꠆ꠔꠣꠞ ꠇꠣꠞꠘ ꠘꠣꠄ ꠛꠦꠁꠟ ꠅꠃꠇ ꠖꠦꠘꠅ ꠀꠞ ꠛꠣꠖꠡꠣꠢꠦ ꠒꠥꠟ ꠝꠣꠞꠣꠁꠀ ꠡꠛ ꠞꠣꠎꠣ ꠛꠣꠖꠡꠣꠢ ꠖꠟꠣ ꠇꠞꠃꠇꠣ।ꠇꠟꠟꠦ ꠔꠣꠘ ꠙꠥꠞꠤ ꠀꠝꠤ ꠛꠣꠞ ꠇꠞꠤ ꠖꠤꠝꠥꠘꠦ। ꠅꠘꠦ ꠁ ꠇꠕꠣ ꠢꠥꠘꠤꠀꠔꠅ ꠛꠣꠖꠡꠣꠢꠦ ꠛꠣꠎꠣꠞꠦ ꠛꠣꠎꠣꠞꠦ ꠒꠥꠟ ꠝꠣꠞꠣꠁꠍꠁꠘ ꠄꠛꠟꠣ ꠡꠛ ꠝꠣꠘꠥꠡ ꠖꠟꠣ ꠅꠁꠍꠁꠘ।

ꠅꠘꠦ ꠖꠟꠣ ꠅꠀꠞ ꠙꠞꠦ ꠀꠡ꠆ꠔꠦ ꠀꠡ꠆ꠔꠦ ꠛꠦꠐꠣ ꠃꠑꠤꠀ ꠉꠦꠍꠦ, ꠉꠤꠀ ꠅꠘꠦ ꠇꠁꠍꠦ ꠅꠃꠎꠦ ꠄꠇꠐꠣ ꠝꠘ꠆ꠖꠤꠞ ꠖꠦꠈꠞꠣꠄ, ꠝꠘ꠆ꠖꠤꠞꠞ ꠖꠞꠎꠣꠐꠣ ꠈꠥꠞꠅ। ꠅꠘꠦ ꠔꠣꠁꠘ ꠔꠣꠁꠘ ꠝꠘ꠆ꠖꠤꠞꠞ ꠖꠞꠎꠣ ꠈꠥꠟꠍꠁꠘ ꠈꠥꠟꠣꠞ ꠙꠞꠦ ꠅꠘꠦꠔꠅ ꠄꠁꠘ ꠔꠣꠁꠘ ꠅꠛꠣꠇ ꠟꠣꠉꠤꠀ ꠃꠑꠍꠁꠘ ꠎꠦ ꠇꠤꠀꠘꠅ ꠀꠍꠟꠣ ꠀꠞ ꠁ ꠊꠐꠘꠣ ꠇꠤꠟꠣ ꠅꠁꠟꠅ ꠁꠔꠣꠔꠅ ꠔꠣꠞꠣ ꠛꠥꠗ ꠙꠣꠁꠞꠣꠘꠣ। ꠃꠑꠍꠁꠘ, ꠃꠑꠣ ꠛꠣꠖꠦ ꠅꠃ ꠡꠣꠔꠉꠥ ꠛꠦꠐꠣ ꠀꠞ ꠛꠣꠖꠡꠣꠢꠞ ꠙꠥꠞꠤ ꠝꠤꠟ꠆ꠟꠅ ꠀꠞꠇꠤ ꠝꠘ꠆ꠖꠤꠞꠞ ꠜꠤꠔꠞꠦ। ꠅꠘꠦ  ꠇꠁꠟꠅ ꠛꠣꠖꠡꠣꠢ ꠇꠃꠇꠣ ꠌꠣꠁꠘ ꠇꠣꠞꠦ ꠉꠞꠖꠘ ꠖꠤꠔꠣ, ꠀꠝꠣꠞꠦ ꠉꠞꠖꠘ ꠖꠤꠛꠣ ꠘꠣ ꠀꠙꠘꠣꠞ ꠙꠥꠞꠤ ꠉꠞꠖꠘ ꠖꠤꠛꠣ। ꠅꠘꠦꠔꠅ ꠛꠣꠖꠡꠣꠢꠦ ꠔꠣꠘ ꠙꠥꠞꠤ ꠡꠁꠖ꠆ꠗꠣ ꠅꠃ ꠡꠣꠔꠅ ꠛꠦꠐꠣꠞꠦ ꠉꠞꠖꠘ ꠖꠤꠟꠣꠁꠟꠣ।